Sámi Pride – Višuvdna!
Sápmelaččaid iežas Pride!
Sápmi Pride lea min bonju sápmelaččaid várás ja sin várás geat ráhkistit, liikojit ja háliidit min. Juohke jagi lágiduvvo Pride ođđa báikkis Sámis, ja juohke jagi leat ođđa olbmot ja searvvit lágideaddjin. Ráhkesvuođa birrajohtimin veahkehit guđet guimmiideamet, jagis jahkái, vuorrolága lágideaddjin ja guossin, ja dán láhkai sihkkarastit ahte Pride ain bistá, mihá ja gievrras.
Sápmi Pride fállá buot norbmarihkku sápmelaččaide deaivvadanbáikki mas vuolggasadji lea Queer-vuohta, ii fal seksuálalaš sodju dahje sohkabealgullevašvuohta. Sámi Pride lea báiki mas sáhttit ovttastallat, festet, máhtu juogadit, lávlut, dánsut, filmmaid geahččat dahje dahkat aiddo maid háliidat moadde diimmu dahje beaivvi. Ja buot maid dahkat, dan dahkat min iežamet vuogi mielde! Sámi vuogi mielde. Queersámi vuogi mielde!
Lea dušše fantasiija mii ráddje min
Muhtumin lea Sámi Prides ruhta, muhtimin ii. Dan maid goit diehtit, lea ahte Sámis leat vaikko man olu ealljáris ja veahkkái olbmot. Dáinna dieđuin lea min višuvdna ahte Sámi Pride šaddá leat iešguđetlágan juohke háve, áinnas ruhtadili geažil, muhto lea dušše fantasiija mii hehtte dan duohtandahkkot juohke jagi. Muhtumin šaddá olles festivála mas leat moadde beaivve doaimmat, eará háve ges šaddá várra Pride-vázzin sámi musihkkafestivála olis, daid várás geat liikká leat doppe. Dehálamos lea ahte mii ain joatkagis leat oidnosis, ahte muosehuhttit ja guoskkahit.
Rehálašvuohta, ráhkisvuohta, árvvusatnin ja veaháš “Love, peace and understanding!”
Sámi Pride lea dás olles Sámi várás. Mihttomearri lea ahte galgá lágiduvvot iešguđetge regiovnnain, čilget iešguđetge vásáhusaid ja čalmmustuhttit iešguđetge oaidninbáikkiid. Ii oktage gii atná iežas sápmelažžan galgá báhcit olggobeallái. Ii oktage galgá dárbbašit ieža bonjuvuođa čilget. Gielalaš olahahttivuohta, rumašlaš ja mielalaš olahahttivuohta leat min dehálamos vuoruheamit. Ii oktage bonjusápmelaš galgá báhcit olggobeallái!
Go sápmelaččat ja bonjusápmelaččat lea girjás joavku mas juohke okta lea erenoamáš indiviida, de lea Sámi Pride duođaid rikkis. Mis leat miljovnnaid mielde iešguđetlágan vásáhusat, oaivilat, máhtut, niegut, jurdagat, ideat, oskut, politihkalaš oaivilat ruohttasat ja čanastagat. Dáppe deaivvadit guđet guimmiideamet ráhkesvuođain ja árvvusatnimiin, ja vuollegašvuođain min iešguđetlágan máhtu ektui. Olmmoš lea loavkitmeahttun , ja danin galgá báhcit ge!
Boađe sisa, boađe olggos, boađe aiddo nu mo leat, dahje aiddo nu mo háliidat!
Dát lea min Pride. Dát lea min višuvdna. Sámi Pride lea juoga maid buot mii, geat deaivvadit, ovttas ráhkadit. Boađe nu mo leat ge, dahje molsso gean nu earán muhtun botta. Vaikko gii don leaččat ge, de lea Sámi Pride dás du várás, ja don leat buresboahtin.
Mii duddjot čielga lanjaid Sámis hbtq-olbmuid várás, ja mii duddjot oinnolaš lanjaid sápmelaččaid várás hbtq-kárttas, mii leat unnitlogujoavkku eamiálbmot. Mii leat queersápmelaččat ja dát lea min festivála.
Bures boahtin Sápmi Pride-festiválii!
Sámi Pride – Višuvdna!
Giitit siribrochjohansen.no jorgalanveahkis!
Source (2017-08-14): Facebook